Jon Irazabal Agirre

Jon Irazabal Agirre Gerediaga Elkartean 17 urte zituela egin zen bazkide eta ordutik elkartea eta bera ez dira banatu. 1982. urtean elkarteak izan zuen lehen soldatapeko langilea izan zen bera eta bere ekintzaile zenetik ikerketa lerro asko zabaldu zituen. 2024ko abuztuaren 22an zendu zen, hurrengo egunean 64 urte betetzeko zituela. 

Eskualdeko historiaren ikerketan eta zabalkundean erreferentzia nagusienetako bat izan da. Durangerriaren zaintzaile nagusienetako bat.

Liburu eta liburuxka asko idatzi ditu Durangaldeko historiari buruz eta guztiak, berak sustatutako Durangaldeko Dokumentategian kontsultatu daitezke. Izan ere, Gerediaga Elkarteak gordetzen dituen Durangerriari buruzko paper, eskuizkribu, dokumentu, objetu, liburu, liburuxka eta argazkien bildumari berak eman zion hasiera.

Durangaldeari hainbeste eman zion Jonek utzitako ondarea ahazturan geratu ez dadin, orri honetara ekarri ditugu elkarteko dokumentategian artxibatuta ditugun bere argitalpenak.